5個繪本親子共讀技巧大放送！

小跳豆媽平時都有舉辦讀書會， 有家長表示唔係太識同小朋友講故事 ，等我喺度同大家分享下5個繪本親子共讀嘅技巧!

1. 選擇合適嘅繪本
要講故事講得好，選擇一款適合嘅繪本好重要。 小朋友係讀者， 家長可以放手畀嘅小朋友去自己揀書。 如果幼兒太細，揀唔到書，家長可以按小朋友的需要同興趣去選擇。家長可以選擇一啲圖畫色彩鮮豔同內容簡單易理解嘅書 ， 年紀小嘅小朋友可以選擇唔同感官刺激嘅書， 例如立體書、 有聲書、 質感書等。

2. 善用小道具
想講故事講得生動，可以善用道具。 其中一種好用嘅道具就係手偶啦。 家長可以使用書中嘅主角角色嘅手偶， 例如動物手偶， 好處係家長可以代入動物角度， 以第一人稱去講述故事。 另外再加上豐富感情同誇張嘅扮聲， 有抑揚頓挫地表達，相信小朋友都會好受吸引， 留心聽故事。

3. 多互動
家長都可以比多啲空間小朋友參與其中。 對住識講嘢嘅小朋友，家長可以向小朋友提問一啲問題， 例如叫小朋友描述下故事角色做緊啲咩， 有咩情緒， 估下之後會發生咩事等。 另外家長都可以觀察下小朋友， 留意下佢哋嘅反應， 例如當小朋友聽聽下突然皺眉頭， 家長可以問下佢當刻嘅感受。

4. 留意自己動機
都好明白家長好緊張小朋友嘅學習， 不過親子共讀嘅過程應該係開心嘅， 所以家長千祈唔好睇睇下書，叫小朋友抄寫書中生字或者默書呀。 另外都唔需要次次指住書上面嘅生字， 刻意叫小朋友學習讀音， 因為咁樣會容易令小朋友失去興趣。 大人同小朋友都要享受當中共讀過程， 投入去讀。

5. 設計延伸活動
家長可以就住繪本內容設計延伸活動， 例如整小手工、 一齊唱歌跳舞等， 增加趣味。 活動亦都可以結合生活， 例如睇完一本關於食物嘅書， 之後可以同小朋友一齊整嘢食。 講完一本關於超級市場嘅書， 又可以帶小朋友去超級市場參觀， 加深小朋友嘅學習。

事不宜遲，大家快D同仔女講故事啦！

謝謝閱畢！
歡迎聯絡: jumpybeanmum@gmail.com
Facebook page: 小跳豆媽育兒記
https://www.facebook.com/小跳豆媽育兒記-1147310555372202/
Blogs 腳印：靚太club,My BB.com, Mamibuy